عشان خاطرعيون بنوتي ضد التيار وابني فاروق هنعمل بشامل النهارده وصينية فراخ وشوربة كريمه
المقادير
*****
كيس مكرونه -2كوب شوربه - 1كيلو لبن -نصف كوب دقيق- 2معلقة سمنه- معلقتين قشطه -فلفل اسود-ملح بهارات -وجنزبيل-مستكه -لحمه مفرومه -3بصله مبشوره-2فص توم-فرخه مغسوله جيدا بالملح والدقيق والخل ومقطعه
الطريقه
******المكرونه
******
توضع حله بها كميه من الماء علي النار حتي تغلي تماما تضاف لها كيس المكرونه وتترك حتي تنضج
اثناء نضج المكرونه نضع اللبن والشوربه علي النار ويضاف الملح والفلفل الاسود والبهارات وفص مستكه(وممكن ملعقة صلصه لو امكن للي يحبها حمراء)ويترك حتي يغلي الجميع
توضع معلقتين السمن علي النار في حله مناسبه مع فص مستكه ويضاف الدقيق ويقلب حتي يتغير لونه فقط مش يغمق ثم يضاف له خليط اللبن والشوربه ويقلب حتي يغلظ قوامه واذا كلكع يضرب بمضرب البيض ويضاف له لمن يحب موزيريلا
توضع البصله المبشوره علي النار مع اللحم المفروم والملح والفلفل والبهارات وتترك حتي تستوي وتشرب الماء الناتج عن الطهي مع التقليب المستمر(ممكن نضع معلقة صلصه زي اللبن )حد هيقول لي فين السمنه مابحطش علي المفروم سمن اللي عايز يحط معلقه واحده بس
تصفي المكرونه في مصفي وتغسل
في صينيه مناسبه نضع راق مكرونه ونرش عليه شويه من البشامل ثم نضع اللحم المفروم ونرش عليه بعض من البشامل ثم نضع باقي المكرونه ونصب فوقها باقي البشامل الا قليل منه يترك هنعمل بيه حاجه تانيه دلوقتي ماننساهوش
وتزج في الفرن(حلوه تزج دي)حتي يحمر وجهها
في ناس هتقولي فين البيض هقول مابعملهاش بالبيض واللي عايز يستني البشامل لما يبرد شويه ويضرب بيضه مع فلفل اسود ويضيفها علي البشامل مع التقليب السريع عشان ماتستويش جواه
وعلي فكره انا بحط في اللبن زعتر كمان وهو بيغلي
الفراخ
******
تنقع الفراخ في البصله المبشوره وفصين التوم المفروم والملح والفلفل والبهارات والجنزبيل من اليوم السابق للطهي او قبل الطهي بساعتين
ترص في صينيه مع معلقة سمن(اللي يحب يضع علي وشها حلقات فلفل رومي وبصل وطماطم بيكون احسن)اناكمان بحطلها زعتر
وترفع علي النار 5الي 10 دقائق ثم تزج في الفرن الي ان تحمر
شوربة الكريمه
*********
باقي البشامل نضع عليه الكوب الثاني من الشوربه وقليل من الماء وفلفل اسود والقشطه ويترك حتي يغلي قليلا
وبالهنا والشفا
الجمعة، 14 نوفمبر 2008
الاشتراك في:
تعليقات الرسالة (Atom)
هناك 17 تعليقًا:
شوربة الكريمه دى ليا فيها
بأحبها وعلى الوش شوية نعناع أخضر
تسلم أيدك يا شموسه
أخيراااااا
هو ده الكلام
تسلم إيدك ياشمس النهار
وشكراااا
ايه ده انا ماشفتش الموضوع ده الاول لانى كنت لسه داخله اشوف الجديد
لقيت اللى فوق عشان كده عيط و قولت و انا و انا )):
لقيتك هنا قولتى و انا و انا (:
شكرا ياشموسه على الاستجابه و اول لما اعملها هاقولك النتيجه
احم احم بس انتى ادعى مايكونش فى خسائر )):
الكلام بقي دسم قوى
و مش ملاحق اكل
تسلم ايديك
*عمرو
بالهنا والشفا
لا وكمان لما يتحط جواها ماشروم وقطع فراخ صغيره وتوست مقرمش
*د/رامي شهاب
تسلم وتعيش
اي خدمه يافندم
*ضد التيار
ظلمتيني زي الزمن
دي الليله دي كلها معموله عشانك
جربيها وطمنيني
وماتخفيش ماحدش بيتولد عارف كل حاجه
لازم نجرب ونتعلم من الغلط قبل الصح
شكرا ليكى ياشمس وهى طريقة مختلفة عن طريقتنا بس امى هتجربها واكيد هتطلع جميلة
*احوال الهوي
لا والله مش دسم هو حلو بس
كل علي مهلك بالهنا والشفاء
*طالب ثانوي
بالهنا والشفاء
بس قول لي النتيجه
ربنا يكرمك
اسفه ياشموسه بجد
الريدر و عاميله بقى هو اللى عمل كده )):
بوسه كبيرة ليكى مش تزعلى منى (:
بيبقى حلو فى العزومه
الله ينور
كده كلنا على الدايت عدل
بأمــــــــــــــوت في المكرونه بالشامل
*ضد التيار
عمري ماازعل من بنوتي حبيبتي
انت عارفه انا بحبك حتي من قبل ماتغيري المدونه
هعملك اكل ناشف اهو
*عمرو
عزومة مين
انت عازم حد عندي في المطبخ
*من غير عنوان
ماتخفش من التخن المهم ماتاكلش كتير
حبه صغيره كده علي القد زي ماالرسول قال
وحاضر طالما بتحب البشامل
هنعمل كوسه بالبشامل وبتنجان وخرشوفو.......الخ
عايز اقولك حاجة
انا ماليش دعوة بالطبيخ و لا بالمطبخ
بس انا داخل هنا عشان مش عارف ادخل المدونة التانية عشان اشوف اخر موضوعات شمس النهار المشوقة مش عارف
لان كل ما ادخل المتصفح عندي بيقول ان في فيرس افيدينا افادك الله
إرسال تعليق