الخميس، 5 يناير 2012

العدس :))


ايوة العدس الاصفر ده عز العدس الاصفر
الشوربة طبعا معروفة
المقادير
====
كيس عدس يقسم نصفين-ملح -فلفل اسود-كمون-جزرة كبيرة -2حبة طماطم-بصلة كبيرة -5فصوص توم حجم كبير
=====
الطريقة
===
نصف كيس العدس يغسل جيدا ويوضع في حلة مناسبة مع البصلة مقطعة اربعه والجزرة مقطعة و2 ثمرة الطماطم مقطعين اربعات وخمس فصوص التوم
تضاف كمية من الماء للخليط السابق وتوضع الحلة علي النار حتي تمام النضج
بعد ان يبرد الخليط السابق يضرب في خلاط حتي يصير كالعصير
يضاف له الملح والفلفل والكمون وممكن بعض من الكرفس الاخضر المقطع صغير
وبعض الاحيان تحمر بعض من الشعرية وتضاف للخليط ويرفع الجميع علي النار حتي تمام نضج الشعرية
===========
كشري العدس الاصفر
========
المقادير
====
نص كيس العدس اللي فوق:))-فص مسنكة-ملح -فلفل اسود -كمون- سمن -شعرية -كرفس اخضر
الطريقة
===
يضاف له كوب رز حتي يكون الخليط عدس ورز
يغسل العدس المخلط مع الرز ويصفي من الماء
في حلة تقدح سمن مع فص مستكة ويصب عليها خليط الرز بالعدس ويقلبوا بعض الوقت
يضاف ماء مغلي او شوربة لحمة او فراخ مغلية علي العدس والرز مع اضافة ملح وفلفل وكمون
ويترك حتي ينضج مثل الرز العادي
=====
ممكن الكشري يطهي في صينية وبعد ان يتشرب الماء قليلا نعمل حفر فيه وفي كل حفرة توضع بيضة نية وعلي وجهها بعض فلفل اسود
وياتغطي وترفع علي نار هادية ياتدخل الفرن
=====
فتة العدس
=====
المقادير
=====
شوربة عدس مطهوة -رز مطهواو كشري عدس مطهو-عيش محمص حسب الطلب -خمس فصوص توم حجم كبير-خل -سمن
الطريقة
====
يكسر العيش ويوضع في صينية ويصب عليه شوربة العدس الي ان يتشربها تماما
نضع علي الوش الرز او كشري العدس الاصفر
نفرم التوم ونحمره في السمن وعندما يصير دهبي فاتح يضاف الخل ويضاف بعض من شوربة العدس ويصب الخليط علي صينية الفتة
وبالهنا والشفا

الاثنين، 27 ديسمبر 2010

ان شاء الله

ان شاء الله
قريبا
سوف يتم تجديد وتحسين وتنظيف

مطبخ شموسه
وان شاء الله سيتم الافتتاح قريبا جدااااااا :))

الأربعاء، 21 يناير 2009

الكوارع

النهارده هنعمل كوارع
وجلاش عشان ضد التيار(حاجه حلوه اهي)ولو ان انا ماليش في الحلو قوي بس ادينا هنجرب مع بعض وربنا يسترها معانا
المقادير
*****كوارع متنظفه جاهزه ومتكسره قطع متوسطة-ملح-دقيق-خل- حبهان مطحون-مستكه-ورق لوري مطحون-جنزبيل-فلفل اسود-3بصلات مبشورين مع اربع فصوص توم
الطريقه
*****تغسل الكوارع جيدا بالملح والدقيق والخل اكثر من مره
وتشطف بالماء جيداوتنقع خمس دقائق في ماء وخل ثم تشطف مره اخيره
يضاف فلفل اسود وملح ولوري الي تلتين البصل المبشور بالتوم وتنقع الكوارع فيه من قبلها بيوم
وتاني يوم في حله مناسبه نضع ماء يغلي ونضع فيه باقي البصل بالتوم مع الحبهان والمستكه واللوري والفلفل الاسود ونأجل الملح عند الدخول في السوا
عند غليان الماء نضع الكوارع ونتركها حتي تنضج جيدا
وكل ما الماء ينقص نضيف ماء بس يكون مغلي ومش بارد
عند تمام النضج سنجد ان العظم بدء ينفصل عن لحمة الكوارع
نستخلص هذا اللحم من العظم جيدا ونقطعه قطع صغيره مناسبه
ونصفي الشوربه الناتجه
لأن احيانا بيكون فيها قطع عظم صغيره جدا
بعد تصفيتها نضع قطع الكوارع المقطعه ونغليهم مع بعض 5دقائق
وتقدم مع الليمون والفته(سبق عمل الفته)ومافيش مانع لحمه كده يعني
-------------------------------------------
الجلاش
******المقادير
***********ورقة جلاش-1كوب سكر-مكسرات للحشو او كاستر-4معالق سمن-فانيليا-نصف كوب لبن مضاف له نصف كوب ماء-عصير نصف ليمونه
الطريقه
******الشربات
****** نضع كوب ونصف ماء مع كوب السكر علي النار حتي يغلي تماما ونضيف له عصير نصف ليمونه ونتركه يغلي ونضيف له الفانيليا
الصينيه
******تفتح ورقة الجلاش و
في صينيه مناسبه مدهونه بالسمن
نضع راق جلاش ويدهن بفرشاة السمن ثم نضع الراق التاني حتي تنتصف الكميه
نضع الحشو(مكسرات او كاستر)ثم نكمل باقي الطبقات
تقطع الصينيه بالسكين مربعات
ثم تسقي بالماء واللبن
وتزج في الفرن حتي تدخل علي اللون الذهبي
وتخرج من الفرن وتسقي بالشربات البارد السابق اعداده
هذه الصينيه علي مسؤلية ضد التيار
وعلي المتضرر اللجوء لها عشان تحرم تقولي عايزه حاجه حلوه
ربنا يستر
وبالهنا والشفا

الخميس، 15 يناير 2009

مسقعه وشوربة عدس

الحمد لله رجعنا نكمل مشوار الطبيخ مع بعض
وعايزه الفت نظر الزوار ان احنا هدفنا نعلم البنوتات الجداد الطبيخ المصري اللطيف
عشان يعرفوا يطبخوا
النهارده هنعمل مسقعه وكمان شوربة عدس بهديها لعمرو بدر عشان هو كان طلبها مني
المقادير
------كيلو باذنجان رومي-نصف كيلو لحم مفروم ونعصجه(عملناه في المكرونه قبل كده)-بصلتين-خمس فصوص توم
زيت للتحمير-4حبات طماطم-كمون-فلفل اسود -ملح(فلفل رومي للي يحب) معلقتين صلصه
الطريقه
------يقشر الباذنجان ويقطع حلقات سمكها واحد سم ويقلب في معلقه صغيره ملح ويترك مش اقل من ساعتين(ليه ماعرفش)
يقلي البلذنجان في الزيت ويترك حتي يصفي منه الزيت
في صينيه يرص راق باذنجان وراق بصل مقطع شرائح رقيقه والثوم مقطع وراق طماطم مقطعه شرائح رقيقه ثم نضع العصاج المضاف ليه ملعقتين الصلصه ثم نضع فوق العصاج راق بصل وتوم ثم راق طماطم (وحلقات الفلفل الاخضر)
نغلي 2كوب ماء ونضع فيهم الكمون والملح والفلفل
ثم يضاف للصينيه وتزج في الفرن علي نار متوسطه حتي ينضج(بافضل ان الصينيه تكون طاجن)
----------------------------------------
العدس
-----
المقادير
------ كوب عدس-جزره-2حبة طماطم-بصله 7فصوص ثوم-كرفس مقطع صغير جدا-3معالق شعريه ناشفه- ملح فلفل اسود- كمون معلقتين سمن
عيش فينو-معلقتين زبده-3فصوص ثوم
الطريقه
-----يغسل العدس جيدا وكذلك الجزره وتقطع قطع صغيره والطماطم وتقطع ايضا والبصله تقطع قطع صغيره والثوم(3فصوص)
يوضع العدس مع الجزر مع الطماطم مع البصل مع الثوم في حله مناسبه تسمح بالغليان دون ان يفور
ويغمر الخليط جيدا بالماء ويترك حتي يتم النضج ويعرف ذلك من سوا الجزر
يترك الخليط حتي يبرد ويضرب في الخلاط ويصفي بالمصفا السلك
تحمر الشعريه في معلقة سمن صغيره حتي تصفر ويسكب عليها خليط العدس
في طاسه صغيره يحمر(4فصوص) الثوم في معلقة سمن صغيره وعندما يتغير لونه يرفع من علي النار ويضاف للعدس
ويتم غلي الجميع حتي تنضج الشعريه في شوربة العدس
وعند غرفها في الاطباق يرش علي وشها الكرفس الطازج.
---------------------------------------------
طرقة عمل العيش الفينو بالثوم
-------------------------
يقطع العيش الفينو حلقات بالورب
ويفرم الثوم جيد ويخلط مع الزبده السايحه قليلا ويدهن الفينو بالفرشاه بهذا الخليط(الزبده والثوم)(ممكن نرش علي وجهه بعض الزعتر لمن يحب)
يزج الفينو في الفرن حتي يحمص
---------------------------
وبالهنا والشفا

الخميس، 20 نوفمبر 2008

كل سنه وانتم طيبين

لدواعي السفر مطبخ شموسه هياخد اجازه
بس عشان امشي وقلبي مطمن انكم اكلتم فته ورقاق هنعملهم قبل مااسافر
المقادير
*****لحمه ضاني(مش شرط)مغسوله جيدا بالملح والدقيق والخل -بصله مبشوره-7فصوص توم-ملح و فلفل اسود وورق لوري مطحون وحبهان مطحون ومستكه وجنزبيل مطحون-خل- 2كوب رز-عيش محمص بلدي-3ملعقة سمن
الطريقه
*****تنقع اللحمه من اليوم السابق او قبل الطهي بساعه في البصل والملح والفلفل الاسود
نضع كميه من الماء في حله مناسبه وبعد ان تغلي نضع البصله المفرومه وفصين توم مفرومين والفلفل الاسود واللوري المطحون والحبهان المطحون والمستكه والجنزبيل المطحون
نتركهم يغلوا دقيقتين ثم نضيف اللحم ونتركه ينضج وبعد النضج نضع الملح ونتركه خمس دقائق يغلي ثم يرفع من علي النار وينشل اللحم من الشوربه
يكسر العيش المحمص الي كسرات ضغيره ويوقلب في ملعقة سمن ثم يوضع في الفرن خمس دقائق
في حله صغيره نضع ملعقة سمن ومعها التوم المفروم علي النار وعندما يتغير لونه نضيف الخل(ملعقتين) ونقس هذا الخليط نصفين نصف نضع عليه الشوربه والنصف الاخر نضيف له صلصه او عصيرطماطم ويترك ليستوي(ودي الدمعه)
النصف الاول نضع تلتينه علي العيش المحمص ويغطي حتي يطري قليلا
في هذه الاثناء نكون عملنا الرز الابيض مثلما عملناه سابقا مع الملوخيه
نضيف الرز علي وجه العيش المغطي بالشوربه حتي يختفي العيش
تلت الشوربه الباقي نغطي به هذا الخليط ونراعي ان يتشرب وجه الرز كله
تقدم صينية الفته ومعها سلطنية الدمعه الحمراء
وبالنسبه للحمه المسلوقه ياتحمر بالسمن ياتترك مسلوقه حسب الطلب
وبالهنا والشفاء
------------------------
الرقاق
*****المقادير
******لفة رقاق -شوربه -بصله مبشوره-لحم مفروم- 5معالق سمن
الطريقه
*****ترفع البصله المبشوره علي النار مع ملعقة سمن وتقلب حتي يتغير لونها فقط يضاف اليها الشوربه وتترك حتي تغلي خمس دقائق
تدهن صينيه بالسمن وفي صينيه اخري نغمر ورقه من الرقاق بالشوربه الساخنه وعشان نحافظ عليها ساخنه تترك علي نار هادئه اثناء العمل
نضع الورقه الاولي المغموره بالشوربه في الصينيه وبفرشة السمن ندهنها بالسمن الساخن ايضا
نكرر هذا الفعل في خمس وريقات ثم نضع اللحم المفروم المعد سابقا
ثم نضع الخمس وريقات التاليه بنفس الطريقه
ثم تزج في الفرن حتي تحمر(اوعوا تتحرق)
وبالهنا والشفا
معلش حاسنه اني كروتكم وكمان ماشرحتش كويس بس مستعجله عشان عندي استعدادت كتيره للحج
كل سنه وانتم طيبين
ادعوا لي وسأدعوا لكم

الأربعاء، 19 نوفمبر 2008

الخرشوف

هنعمل خرشوف بالبشامل وكمان سلطة خرشوف وكمان بيكاتا صحيح هي مش مصري بس هي اللي بتليق مع الخرشوف
المقادير
*****خرشوف متنظف - بشامل(سبق تحضيره)-لحمه مفرومه(سبق تحضيرها)- ملح وفلفل اسود وبهارات وحبهان ومستكه - لحمه مقطعه مثل البوفتيك بس اصغر واتخن
دقيق -و2معلقة سمن- مشورم -بصله - فص توم-زيتون اسود مخلي- 1فلفل اخضر-كمون-ملعقة زيت-ليمونه
الطريقه
****يسلق الخرشوف ويحمر قليلا في السمن ويرص في صينيه بعد ان يحشي باللحمه المفروم و يصب البشامل فوقه ويزج في الفرن حتي يحمر وجهه
البيكاتا
*****تغطي اللحمه بالدقيق ونضع السمن في الصينيه ونحمر اللحمه فيها جيدا ثم نضيف الماء المغلي عليها والملح والفلفل الاسود والحبهان والمستكه والبهارات وتترك حتي يتم النضج وبعد النضج نضيف المشروم وبعد دقيقتين نرفعه من علي النار(ممكن ننقع اللحمه من قبلها في بصل متبل)
السلطه
*****يسلق الخرشوف ويقطع قطع صغيره نوعا ماوتقطع البصله حلقات ويرش عليها الملح والفلفل وتترك قليلا يقطع الفلفل الاخضر حلقات وتفرم التومه
في طبق صيني كبير(سولديره)يوضع الخرشوف ومعه الثوم والبصل والفلفل الاخضر والزيتون الاسود والملح والكمون والزيت ويقلب الجميع جيداويضاف الزيت وتقدم هذه السلطه مع التوست الساخن

وبالهنا والشفا

الاثنين، 17 نوفمبر 2008

طاجن الرز

السلاااااااااااااااااااااام عليكم بناء علي طلب صابر وراضي
اللي مش راضي باللي بعمله ومش صابر عليه اعمله كل اللي هو عايزه هنعمل علي بركة الله برام رز
المقادير
*********كبد وقوانص حسب الطلب الوزن-بصلتين مبشورين-فص توم- نصف كوب لبن- كوب شوربه- نصف كوب ماء- 2كوب رز- ملح فلفل-حبهان-مستكه-لوري مطحون-لحمه شرائح انتركوت-خل-3ملعقة سمنه
الطريقه
********تغسل الكبد والقوانص جيدا بالملح والدقيق والخل وتقطع قطع صغيره بالنسبه للقوانص اما الكبده الحجم اكبر عشان فرق السوا-وتنقع ساعه في البصل المبشور والتومه المفرومه والملح والفلفل والحبهان المطحون واللوري المطحونه
يغسل الرز ويضاف الي الخليط السابق ويقلب مع وضع معلقة سمنه ويوضع الكل في حله ويضاف الماء ونصف الشوربه والمستكه
ويرفع علي النارحتي يشرب الشوربه بالماء
ينقل في الطاجن او البرام ويضاف اللبن المغلي مع باقي الشوربه ويزج في الفرن
ويترك الي ان ينضج
اللحمه
*****توضع معلقتين السمنه في صينيه واول ماتقدح نضع شرائح اللحم ونقلب حتي يحمر اللون
نخلط كوب ماء مع ربع كوب خل مع ملح مع فلفل اسود ونضيفهم للحمه وتغطي وكل ماتشرب الماء نضيف نصف كوب ماء الي ان يتم النضج(اللحمه دي مهداه الي ابني مفكر وابني رامي شهاب)
بالهناء والشفاء