الخميس، 20 نوفمبر، 2008

كل سنه وانتم طيبين

لدواعي السفر مطبخ شموسه هياخد اجازه
بس عشان امشي وقلبي مطمن انكم اكلتم فته ورقاق هنعملهم قبل مااسافر
المقادير
*****لحمه ضاني(مش شرط)مغسوله جيدا بالملح والدقيق والخل -بصله مبشوره-7فصوص توم-ملح و فلفل اسود وورق لوري مطحون وحبهان مطحون ومستكه وجنزبيل مطحون-خل- 2كوب رز-عيش محمص بلدي-3ملعقة سمن
الطريقه
*****تنقع اللحمه من اليوم السابق او قبل الطهي بساعه في البصل والملح والفلفل الاسود
نضع كميه من الماء في حله مناسبه وبعد ان تغلي نضع البصله المفرومه وفصين توم مفرومين والفلفل الاسود واللوري المطحون والحبهان المطحون والمستكه والجنزبيل المطحون
نتركهم يغلوا دقيقتين ثم نضيف اللحم ونتركه ينضج وبعد النضج نضع الملح ونتركه خمس دقائق يغلي ثم يرفع من علي النار وينشل اللحم من الشوربه
يكسر العيش المحمص الي كسرات ضغيره ويوقلب في ملعقة سمن ثم يوضع في الفرن خمس دقائق
في حله صغيره نضع ملعقة سمن ومعها التوم المفروم علي النار وعندما يتغير لونه نضيف الخل(ملعقتين) ونقس هذا الخليط نصفين نصف نضع عليه الشوربه والنصف الاخر نضيف له صلصه او عصيرطماطم ويترك ليستوي(ودي الدمعه)
النصف الاول نضع تلتينه علي العيش المحمص ويغطي حتي يطري قليلا
في هذه الاثناء نكون عملنا الرز الابيض مثلما عملناه سابقا مع الملوخيه
نضيف الرز علي وجه العيش المغطي بالشوربه حتي يختفي العيش
تلت الشوربه الباقي نغطي به هذا الخليط ونراعي ان يتشرب وجه الرز كله
تقدم صينية الفته ومعها سلطنية الدمعه الحمراء
وبالنسبه للحمه المسلوقه ياتحمر بالسمن ياتترك مسلوقه حسب الطلب
وبالهنا والشفاء
------------------------
الرقاق
*****المقادير
******لفة رقاق -شوربه -بصله مبشوره-لحم مفروم- 5معالق سمن
الطريقه
*****ترفع البصله المبشوره علي النار مع ملعقة سمن وتقلب حتي يتغير لونها فقط يضاف اليها الشوربه وتترك حتي تغلي خمس دقائق
تدهن صينيه بالسمن وفي صينيه اخري نغمر ورقه من الرقاق بالشوربه الساخنه وعشان نحافظ عليها ساخنه تترك علي نار هادئه اثناء العمل
نضع الورقه الاولي المغموره بالشوربه في الصينيه وبفرشة السمن ندهنها بالسمن الساخن ايضا
نكرر هذا الفعل في خمس وريقات ثم نضع اللحم المفروم المعد سابقا
ثم نضع الخمس وريقات التاليه بنفس الطريقه
ثم تزج في الفرن حتي تحمر(اوعوا تتحرق)
وبالهنا والشفا
معلش حاسنه اني كروتكم وكمان ماشرحتش كويس بس مستعجله عشان عندي استعدادت كتيره للحج
كل سنه وانتم طيبين
ادعوا لي وسأدعوا لكم

الأربعاء، 19 نوفمبر، 2008

الخرشوف

هنعمل خرشوف بالبشامل وكمان سلطة خرشوف وكمان بيكاتا صحيح هي مش مصري بس هي اللي بتليق مع الخرشوف
المقادير
*****خرشوف متنظف - بشامل(سبق تحضيره)-لحمه مفرومه(سبق تحضيرها)- ملح وفلفل اسود وبهارات وحبهان ومستكه - لحمه مقطعه مثل البوفتيك بس اصغر واتخن
دقيق -و2معلقة سمن- مشورم -بصله - فص توم-زيتون اسود مخلي- 1فلفل اخضر-كمون-ملعقة زيت-ليمونه
الطريقه
****يسلق الخرشوف ويحمر قليلا في السمن ويرص في صينيه بعد ان يحشي باللحمه المفروم و يصب البشامل فوقه ويزج في الفرن حتي يحمر وجهه
البيكاتا
*****تغطي اللحمه بالدقيق ونضع السمن في الصينيه ونحمر اللحمه فيها جيدا ثم نضيف الماء المغلي عليها والملح والفلفل الاسود والحبهان والمستكه والبهارات وتترك حتي يتم النضج وبعد النضج نضيف المشروم وبعد دقيقتين نرفعه من علي النار(ممكن ننقع اللحمه من قبلها في بصل متبل)
السلطه
*****يسلق الخرشوف ويقطع قطع صغيره نوعا ماوتقطع البصله حلقات ويرش عليها الملح والفلفل وتترك قليلا يقطع الفلفل الاخضر حلقات وتفرم التومه
في طبق صيني كبير(سولديره)يوضع الخرشوف ومعه الثوم والبصل والفلفل الاخضر والزيتون الاسود والملح والكمون والزيت ويقلب الجميع جيداويضاف الزيت وتقدم هذه السلطه مع التوست الساخن

وبالهنا والشفا

الاثنين، 17 نوفمبر، 2008

طاجن الرز

السلاااااااااااااااااااااام عليكم بناء علي طلب صابر وراضي
اللي مش راضي باللي بعمله ومش صابر عليه اعمله كل اللي هو عايزه هنعمل علي بركة الله برام رز
المقادير
*********كبد وقوانص حسب الطلب الوزن-بصلتين مبشورين-فص توم- نصف كوب لبن- كوب شوربه- نصف كوب ماء- 2كوب رز- ملح فلفل-حبهان-مستكه-لوري مطحون-لحمه شرائح انتركوت-خل-3ملعقة سمنه
الطريقه
********تغسل الكبد والقوانص جيدا بالملح والدقيق والخل وتقطع قطع صغيره بالنسبه للقوانص اما الكبده الحجم اكبر عشان فرق السوا-وتنقع ساعه في البصل المبشور والتومه المفرومه والملح والفلفل والحبهان المطحون واللوري المطحونه
يغسل الرز ويضاف الي الخليط السابق ويقلب مع وضع معلقة سمنه ويوضع الكل في حله ويضاف الماء ونصف الشوربه والمستكه
ويرفع علي النارحتي يشرب الشوربه بالماء
ينقل في الطاجن او البرام ويضاف اللبن المغلي مع باقي الشوربه ويزج في الفرن
ويترك الي ان ينضج
اللحمه
*****توضع معلقتين السمنه في صينيه واول ماتقدح نضع شرائح اللحم ونقلب حتي يحمر اللون
نخلط كوب ماء مع ربع كوب خل مع ملح مع فلفل اسود ونضيفهم للحمه وتغطي وكل ماتشرب الماء نضيف نصف كوب ماء الي ان يتم النضج(اللحمه دي مهداه الي ابني مفكر وابني رامي شهاب)
بالهناء والشفاء

الجمعة، 14 نوفمبر، 2008

سهو مني

نسيت اذكر ان الدكتور رامي كان عايز بشامل كمان وماينفعش نزعله
ابله نظيره تزعل مننا

البشامل

عشان خاطرعيون بنوتي ضد التيار وابني فاروق هنعمل بشامل النهارده وصينية فراخ وشوربة كريمه
المقادير
*****
كيس مكرونه -2كوب شوربه - 1كيلو لبن -نصف كوب دقيق- 2معلقة سمنه- معلقتين قشطه -فلفل اسود-ملح بهارات -وجنزبيل-مستكه -لحمه مفرومه -3بصله مبشوره-2فص توم-فرخه مغسوله جيدا بالملح والدقيق والخل ومقطعه
الطريقه
******المكرونه
******
توضع حله بها كميه من الماء علي النار حتي تغلي تماما تضاف لها كيس المكرونه وتترك حتي تنضج
اثناء نضج المكرونه نضع اللبن والشوربه علي النار ويضاف الملح والفلفل الاسود والبهارات وفص مستكه(وممكن ملعقة صلصه لو امكن للي يحبها حمراء)ويترك حتي يغلي الجميع
توضع معلقتين السمن علي النار في حله مناسبه مع فص مستكه ويضاف الدقيق ويقلب حتي يتغير لونه فقط مش يغمق ثم يضاف له خليط اللبن والشوربه ويقلب حتي يغلظ قوامه واذا كلكع يضرب بمضرب البيض ويضاف له لمن يحب موزيريلا
توضع البصله المبشوره علي النار مع اللحم المفروم والملح والفلفل والبهارات وتترك حتي تستوي وتشرب الماء الناتج عن الطهي مع التقليب المستمر(ممكن نضع معلقة صلصه زي اللبن )حد هيقول لي فين السمنه مابحطش علي المفروم سمن اللي عايز يحط معلقه واحده بس
تصفي المكرونه في مصفي وتغسل
في صينيه مناسبه نضع راق مكرونه ونرش عليه شويه من البشامل ثم نضع اللحم المفروم ونرش عليه بعض من البشامل ثم نضع باقي المكرونه ونصب فوقها باقي البشامل الا قليل منه يترك هنعمل بيه حاجه تانيه دلوقتي ماننساهوش
وتزج في الفرن(حلوه تزج دي)حتي يحمر وجهها
في ناس هتقولي فين البيض هقول مابعملهاش بالبيض واللي عايز يستني البشامل لما يبرد شويه ويضرب بيضه مع فلفل اسود ويضيفها علي البشامل مع التقليب السريع عشان ماتستويش جواه
وعلي فكره انا بحط في اللبن زعتر كمان وهو بيغلي
الفراخ
******
تنقع الفراخ في البصله المبشوره وفصين التوم المفروم والملح والفلفل والبهارات والجنزبيل من اليوم السابق للطهي او قبل الطهي بساعتين
ترص في صينيه مع معلقة سمن(اللي يحب يضع علي وشها حلقات فلفل رومي وبصل وطماطم بيكون احسن)اناكمان بحطلها زعتر
وترفع علي النار 5الي 10 دقائق ثم تزج في الفرن الي ان تحمر
شوربة الكريمه
*********
باقي البشامل نضع عليه الكوب الثاني من الشوربه وقليل من الماء وفلفل اسود والقشطه ويترك حتي يغلي قليلا
وبالهنا والشفا

الخميس، 13 نوفمبر، 2008

ملوخيه تاني

بناء علي طلب الاخ عمرو هنعمل ملوخيه ناشفه وبالارانب حسب طلب الاخ م/بدون عنوان
المقادير
********
ارنب مغسول بالملح والدقيق والخل جيدا-فلفل اسود-لوري-حبهان-مستكه-جزرتين-بصله مبشوره-كسبره ناشفه-4فصوص توم-ملح-3معالق سمن -2حزمة سلق اخضر-ربع كيلو ملوخيه ناشفه
الطريقه
********
ينقع الارنب في البصله المبشور والملح والفلفل من اليوم السابق في الثلاجه او قبل الطهي بساعتين
توضع 2معلقة سمنه في حله علي النار مع فصين المستكه وبعد ان تقدح نضع الارنب ونحمره جيدا في هذه الاثناء نكون بنغلي كميه من الماء
بعد التحمير نغمر الارنب المحمر بالماء المغلي في نفس الحله ونضع اللوري والحبهان والفلفل وباقي البصله المبشوره والجزر بعد غسله وتقطيعه قطع كبيره
ونترك الارنب يستوي وبعد السوا ننشله من الشوربه وكذلك الجزر
وبعد ان يبرد نحمره مره اخري في الزيت والسمن ويقدم مع الجزر والملوخيه
الملوخيه
*********
يغسل السلق جيدا وينزع الورق من الاعواد
يخرط مع الملوخيه الناشفه مع اضافت رشات خفيفه من الماء البارد حتي تصير الهيئه مثل الملوخيه الخضراء
تغلي شوربة الارنب ونضع بها خليط الملوخيه والسلق وتترك علي النار مع التقليب علي الا تغلي
في طاسه صغيره يوضع التوم المفروم والسمن وبعد قليل نضيف الكسبره الناشفه وعندما يصير اللون ذهبي تضاف للملوخيه
وطبعا تقدم مع الارنب مع رز ابيض
وبالهنا والشفا

الأربعاء، 12 نوفمبر، 2008

الملوخيه

المقادير
*********
كيس ملوخيه او نص كيلو ملوخيه طاظه ومتقطفه-فراخ او لحمه-حباية طماطم واخري فلفل اخضر-فلفل اسود-كسبره ناشفه -حبهان ومستكه ولوري و3قرنفل-7فص توم-وبصله مبشوره-صلصه-ومعلقتين سمن-ملح
الطريقه
*****
اولاهنعمل الشوربه(نجيب حله ونضع في تلتها ماء ونرفعها علي النار وعند الغليان نضع البصله المبشوره مع فص توم متقطع مع الحبهان واللوري والمستكه والقرنفل والطماطمايه والفلفل الاخضر والفلفل الاسود
وبعد دقيه نضع اللحمه او الفراخ(الفراخ طبعا تكون مغسوله بالملح والدقيق والخل)
نتركهم حتي يتم النضج(في منتصف النضج يضاف الملح)
في الوقت ده نجهز الملوخيه
نغسلها لو طاظه ونخرطها
000
بعد ان يتم النضج نطلع اللحمه او الفراخ من الشوربه وكذلك الطماطمايه والفلفل الرومي
ونولع علي الشوربه اول ماتغلي نضع الملوخيه سواء المجمده او الطاظاونقفل النار ونقلبها شويه
في طاسه صغيره نضع 3فصوص توم مفرومين مع معلقة سمن بعد دقيقه نضيف الكسبره الناشفه ونقلبهم الي ان يتحول لون التوم للذهبي ترفع من علي النار وتضاف للملوخيه الساخنه (لاطغطي حتي لايتغير لونها)
---------
نرجع للحمه او الفراخ
---------
لولحمه(هنعمل دمعه)
----
نفرم 3فصوص توم ونضعها في حله صغيره مع معلقة سمن وتقلب حتي يصبح لونها ذهبي تضاف معلقتين صلصه ويتقلبوا كويس ثم نضيف اللحم ونقلب مره اخري لمدة دقيقه ثم نضيف 2كوب ماء ويفضل ان يكون ساخن ونضيف الفلفل الاسود والملح ويترك علي النار 5 دقائق فقط والطماطمايه والفلفل الرومي اللي اتسلقوا في الشوربه نضيفهم لهذا الخليط
لو فراخ
----------
لما تبرد نحمرها في خليط من السمن والزيت عشان تكون مقرمشه وطريه في نفس الوقت
او نضعها في صينيه وندهنها سمن وليمون وصلصه ونحطلها الطماطمايه والفلفل الاخضر اللي اتسلق في الشوربه وندخله الفرن لحد ماتحمر شويه
--------
الرز طبعا ابيض وعملناه قبل كده مع الباميه
وبالهنا والشفا

الاثنين، 10 نوفمبر، 2008

الباميه

**المقادير
كيس باميه او نص كيلو باميه طاظه متقمعه(بتتباع متقمعه)
صلصه جاهزه(طبعا او ممكن نضرب نص كيلو طماطم في الخلاط ونصفيها)
معلقة سمنه او تلاته زيت-فلفل اسود-ملح-كمون-وحدة فلفل اخضر-4فصوص توم مهروس-بصله مبشوره-كسبره ناشفه
لحمه مكعبات او لحم مفروم الوزن حسب الطلب
**الطريقه
في طريقتين
اول واحده اسمها (ني في ني)ودي مش بس للباميه لكل الخضار
تتسلق الحمه كويس
ويتحط البصل والصلصه مع كل الاضافات من خضار لتوم لملح لكله ني مع السمنه ويتحط علي النارويستوي مع بعضه
ودي اسهل طريقه(علي فكره بنتي شغاله بيها بتحط كله علي بعضه )
الطريقه الاصليه
ترفع البصله المبشوره علي النار مع السمن حتي يتحول لونها الي اللون الذهبي الفاتح وتضاف لها اللحمه النيه وتتقلب لحد مالونها يتغيرويضاف لها الصلصه وتقلب معها جيدا يضاف الماء ويفضل
ان يكون ساخن جدا
والتوابل(الفلفل والكمون والبهارت للي يحب) ويترك الجميع علي النار حتي تستوي اللحمه بس مش جيدا(هعرفها ازاي ياماما طلعي حته واغرزي فيها شوكه هتلاقيها استوت ياعين ماما)
بعد كده هنحط الباميه النايه علي اللحم بالصلصه ونترك الباميه تستوي مع تكملت سوا اللحمه
بعد شويه يعني تلت ساعه نضع التوم مع معلقه صغيره سمنه علي النار ونحمرهه شويه صغيره ونحط له الكسبره الناشفه ونضيفه علي الباميه اللي لسه علي النار وكذلك نضيف حباية الفلفل الاخضر المغسوله ومقطعه قطع صغيره علي الباميه وتغطي الحله ونطفي النار
***
لو عايزه الباميه باللحم المفروم نفس الخطوات بس بدل المكعبات لحم مفروم واول مايتغير لوتها نكمل الخطوات
--------------
ممكن بدل مانحمر التومه لوحدها نحطها نايه وبلاش كسبر او نحطها كده زي مابنحط الفلفل الاسود
وممكن نحط كسبره خضره مفرومه مع تحمير البصله في الاول بدل الكسبره الناشفه
--------------
الارز
----
نص كيلو رز-معلقة سمنه- 2كوب ماء ساخن-معلقه صغيره ملح
يغسل الارز جيدا
توضع السمنه علي النار ولما تسيح نضيف الرز ويقلب تقلبتين ويضاف الملح ثم الماء الساخن ولما يغلي نهدي النار وناخد بالنا منه لايتحرق بعد عشر دقائق نطفي عليه
----------------------------------------------------------------
ايه الاخبار عرفت اشرح الباميه والا لا
اول مره اوصف مقادير
اصل انا بطبخ بالبركه ايديه زي ماتقولوا كده ميزان
طبعا عرفتوا الغدا عندنا ايه النهارده
اقابلكم بعد بكره في وجبه جديده
وبالهنا والشفا

الأحد، 9 نوفمبر، 2008

بسم الله الرحمن الرحيم

الي المدونات والمدونين
ان شاء الله هنبتدي نتعلم الطبيخ مع بعض
وخصوصا البنوتات اللي داخلين علي جواز والزوجات الصغيرات همه دول همي الاكبر
احنا مش هنخترع والا حاجه احنا هنتعلم مع بعض الطبيخ العادي المصري الجميل بتعنا وبعد ما نخلصه في السكه كده نعمل شوية اختراعات علي الماشي
مش هقرا من كتاب والا حاجه انا هعمل اللي بعمله في المطبخ عندي وبرحب طبعا بكل اسألتكم واقتراحتكم
واللي عايزه تعرف حاجه معينه لو اعرف اعملها هنزلها في بوست ولو مااعرفش هسأل عليها وبعدين انزلها
هنبتدي من الصفر
زي كده لما بنتعلم لغه مش بنبتدي من الحروف الابجديه احنا هنعمل كده مع بعض وشويه شويه سنجيد لغة الطبخ
ان شاء الله بكره هنعمل اول وجبه