الاثنين، 10 نوفمبر 2008

الباميه

**المقادير
كيس باميه او نص كيلو باميه طاظه متقمعه(بتتباع متقمعه)
صلصه جاهزه(طبعا او ممكن نضرب نص كيلو طماطم في الخلاط ونصفيها)
معلقة سمنه او تلاته زيت-فلفل اسود-ملح-كمون-وحدة فلفل اخضر-4فصوص توم مهروس-بصله مبشوره-كسبره ناشفه
لحمه مكعبات او لحم مفروم الوزن حسب الطلب
**الطريقه
في طريقتين
اول واحده اسمها (ني في ني)ودي مش بس للباميه لكل الخضار
تتسلق الحمه كويس
ويتحط البصل والصلصه مع كل الاضافات من خضار لتوم لملح لكله ني مع السمنه ويتحط علي النارويستوي مع بعضه
ودي اسهل طريقه(علي فكره بنتي شغاله بيها بتحط كله علي بعضه )
الطريقه الاصليه
ترفع البصله المبشوره علي النار مع السمن حتي يتحول لونها الي اللون الذهبي الفاتح وتضاف لها اللحمه النيه وتتقلب لحد مالونها يتغيرويضاف لها الصلصه وتقلب معها جيدا يضاف الماء ويفضل
ان يكون ساخن جدا
والتوابل(الفلفل والكمون والبهارت للي يحب) ويترك الجميع علي النار حتي تستوي اللحمه بس مش جيدا(هعرفها ازاي ياماما طلعي حته واغرزي فيها شوكه هتلاقيها استوت ياعين ماما)
بعد كده هنحط الباميه النايه علي اللحم بالصلصه ونترك الباميه تستوي مع تكملت سوا اللحمه
بعد شويه يعني تلت ساعه نضع التوم مع معلقه صغيره سمنه علي النار ونحمرهه شويه صغيره ونحط له الكسبره الناشفه ونضيفه علي الباميه اللي لسه علي النار وكذلك نضيف حباية الفلفل الاخضر المغسوله ومقطعه قطع صغيره علي الباميه وتغطي الحله ونطفي النار
***
لو عايزه الباميه باللحم المفروم نفس الخطوات بس بدل المكعبات لحم مفروم واول مايتغير لوتها نكمل الخطوات
--------------
ممكن بدل مانحمر التومه لوحدها نحطها نايه وبلاش كسبر او نحطها كده زي مابنحط الفلفل الاسود
وممكن نحط كسبره خضره مفرومه مع تحمير البصله في الاول بدل الكسبره الناشفه
--------------
الارز
----
نص كيلو رز-معلقة سمنه- 2كوب ماء ساخن-معلقه صغيره ملح
يغسل الارز جيدا
توضع السمنه علي النار ولما تسيح نضيف الرز ويقلب تقلبتين ويضاف الملح ثم الماء الساخن ولما يغلي نهدي النار وناخد بالنا منه لايتحرق بعد عشر دقائق نطفي عليه
----------------------------------------------------------------
ايه الاخبار عرفت اشرح الباميه والا لا
اول مره اوصف مقادير
اصل انا بطبخ بالبركه ايديه زي ماتقولوا كده ميزان
طبعا عرفتوا الغدا عندنا ايه النهارده
اقابلكم بعد بكره في وجبه جديده
وبالهنا والشفا

هناك 27 تعليقًا:

طالب ثانوى يقول...

مية مية بس انا عموما مبحبش البامية وكل الاكلات المزفلتة دى زى الملوخية والكوسة والسبانخ والخ الخ

متشيلى حكاية تاكيد الكلام دى

عمرو يقول...

الله .. أنا بأحب الباميه جدا خصوصا فى الصيف مع البتنجان المخلل
بس طريقة النى فى النى دى كويسه و مش بتتحن أوى زى المسبك
لما أروح أغيظ أم العيال و أعرفها أنى بأعرف أطبخ باميه و بطريقتين كمان ههههه

ضد التيار يقول...

اول وجبه تكون باميه ):

ليه بس كده )):

شرحك حلو مش مكلكع على فكره زى مابنشوف فى بعض المواقع و تحسى كده اننا فعلا قاعدين معكى و شايفين زى التليفزيون (:

شمس النهار يقول...

*طالب ثانوي
ماش ياروقه عايز تاكل ايه
بس معلش المره الجايه هعمل ملوخيه
وبعدها قول لي عايز ايه بس تكون وجبه مصريه

شمس النهار يقول...

*عمرو
طب اتفضل عندنا وكمان عامله بتنجان مخلل وانا وبنتي الوسطانيه بنحبها جدا
المسبك له اكلات والني في ني له اكلات
يعني الباميه ماتكونش علي اصولها الا لو اتسبكت
لكن الفاصوليا الخضره لا
احسن حاجه ليها الني في ني وكمان تكون اللحمه بتلو او كنوز مش كبير قوي
المره الجايه ملوخيه
مشهوره بيها جدا كان بابا الله يرحمه لما يعرف اني جايه وطبعا انا علي طول كنت جايه يقول تعملي ملوخيه بقه
بدل ما تغظها هات المقادير وادخل المطبخ وفاجئه انك عملتها

شمس النهار يقول...

*ضد التيار
مابتحبيهاش ليه زعلتيني
دي مفيده جدا
حاولي تعمليها انت وهتلاقيها لها طعم تاني خالص
طيب انت عايزه اكلت ايه

عمرو يقول...

يا ستى يزيد فضلك و يجعله دايما عامر
الملوخيه حلوه بس الصوت اللى بتعمله الستات و هم بيحطوا التوم عليها بيخضنى بصراحه هههههههه
على فكره السوايسه بيعملوا ملوخيه بالجمبرى عارفاها الطريقه دى ؟
يا شمس أنا كنت ممنوع من دخول المطبخ و لا زلت
الميل ما وصلش لسه

شمس النهار يقول...

*عمرو
حلو موضوع الفلكولور بتاع شهقة الملوخيه
دي بس انا مابعملهاش
هي ناقصه خضايض
موضوع الملوخيه بالجنبري ده عارفاه بس مااعرفش اعملها ممكن اسأل العشيره السكندريه واكتبها لكم
ممنوع من دخول المطبخ
عند حظر تجول
طب زعلنين ليه من الحكومه علي قانون الطوارء
الميل ماوصلش ليه البوستجي واخد اجازه
هشوف الموضوع ده

صابر وراضى يقول...

وعليكم السلااااااااااااام
ايه دا يا جماعه هو المطبخ اشتغل ومفيش حد يقول؟؟؟؟
على كل حال انا شامم ريحه حلوه
الله دا باميه
طيب ادوق ولا على السفره
خلاص معلقه واحده بس
وبعد هقولك ايه الاخبار.
ممممممممممممممممممممممممم
جميل

بس فى شكوى يا ستى
اه فى شكوى
انتى حطيتى صلصه ليه؟
امال الطماطم راحت فين؟
على فكره الطماطم احسن من الصلصه واطعم كمان
"انا سامع واحد بيقول لو مش عاجبك روح اطبخ مكانها"
خلاص يا ستى الباميه زى العسل

شمس النهار يقول...

*صابر وراضي
وعليكم السلام
اصلي ياسيدي البنات بتوع اليومين دول بيستسهلوا
والصلصه اسهل من ضرب الطماطم في الخلاط وتصفيتها
المهم الشرح كويس وهتجربها
سمي وكل بالهناوالشفا

ابو على يقول...

هههههههههه
هيا الباميه ورانا ورانا
طب مفيش حلقه قلقاس

طب بجد بجد ومن غير هزار
بتعرفى تعملى مربه كوسه؟؟
هههههههههههه
اوعى تضحكى انا بتكلم جد
انا مستنى ردك

شمس النهار يقول...

*ابو علي (الجديد)
حاضر ان شاء الله نعمل حلقه عن القلقاس
لا الحقيقه مابعرفش اعمل مربي من الكوسه
بس لو عندك الوصفه اكتبها وانا انزلها في بوست علي اسمك
وفرصه نعرف حاجه جديده
نورت المطبخ

ابو على يقول...

ههههههههه
ما بلاش ابو على الجديد دى

المهم الوصفه اهى

خرطى القلقاس قطعا صغيره واغسليها بالماء من الصنبور:d

احضرى حله كبيره وضعى كميه كبيره من الماء ثم ضعى القلقاس فيها وضعى الحله على النار لغايه لما تغلى

بعد الغلى جيدا طلعى قطع الكوسه المهريه ف الخلاط واخلطيها جيدا

ملحوظه
لا ترمى الماء المغلى ف هو ما زال على النار

ضعى الخلطه ف الماء المغلى

احضرى السكر وليكن كيلو سكر لحله كبيره

ازيبى السكر ف الخلطه اللى بتغلى

بعد التأكد من الغلى مره اخرى اخفضى درجه حراره النار
هاتى مقدار من النشا وليكن اربع معالق كبيره لثلات كبايات من المياه الساقعه
اذيبى النشا ف الماء

ضعى خلطه النشا بالماء على خلطه الكوسه على النار برفق ومش مره واحده حتى لا يتجلط النشا
مع التقليب المستمر

على مره تانيه النار على الخلطه الجديده لغايه لما تغلى
ملحوظه : هاتشوفى فقاقيع دى علامه الغليان ههههههههههههه
اطفقى النار وضعى الوصفه دى ف الاطباق وتاكلوها بالهنا والشفا

على فكره انا طباخ هايل لو عايزه تعرفى حاجات تانيه

هياقريبه من طريقه عمل الرز بلبن بس جميله لو عملتيها
لو فشلتى ف المره الاولى حاولى تانى هاتطلع هايله بس ف المره الاولى حاولى يبقى المقادير قليله عشان لو باظت منك مترمهاش على الارض

تحياتى بقى

ابو على يقول...

على فكرررررررررررررره
انا قولت القلقاس ف الاول وانا اساسا بتكلم عن الكوووووووسه

دى غلطه مطبعيه

طالب ثانوى يقول...

مكرونة بالباشميل

شمس النهار يقول...

*طالب ثانوي
حاضر من عينيه بعد بوست الملوخيه هنعمل بشامل
معلش انا ماحبش ارجع في كلامي
عشان اعلنت عن الملوخيه

د/ رامي شهاب الدين يقول...

حلوة البامية .. وإن كنت أفضل الكوسة مش عشان يعنى هيا مالية بلدنا، ولكنها كمايقال عنها غذاء الفلاسفة .. ماعلينا

وأنا بضم صوتى لطالب ثانوى وعايزين مكرونة بالباشميل

مبروك عليكى المدونةالجديدة ، وحاليا بفكر فى دمجها بأبلة نظيرة هههههه

دمتى بكل خير .. تحياتى

أحــوال الهـوي يقول...

البامية
طعمها لذيذ و اول مرة اجرب الباميه ني x ني و كمان مسأله الكسبرة جديده علي
بالنسبة للرز انت سهلتيها خالص بوصفة سريعة لكنها قد تؤدي لكيكة الرز نسيت تقولي ان الرز المصري يجب ان نحدد كمية المياة المستعملة يادوب مغطيه الرز و بعدين نسيبه يغلي شويه و نوطي النار خالص لحد ما يستوي ... كده يبقي مفلفل و لذيذ

تسلم اديك

الازهرى يقول...

العزيزة شمس النهار

وجبة جميلة ولكن هناك عقبتين
الاولى اننى لا اكل البامية
الثانية اننى لا اقرب المطبخ
ولكن اعد بنقل الوصفة الى المختصين

تحياتى

Teawater يقول...

انا هنزل الأكلات بتاعتك ديه يا مامتي قريب بعد الأجازة بتاعت الميد تيرم تحت عنوان طبخات شمس النهار عشان كل البنات الحاسوباتيين يعرفوا يطبخوا والي اساسا 90% منهن مدينه جامعيه وبيطبخوا لنفسهم فرصه بقا يتعلموا وميرسيه اليكي كتير يا مامتي
انا عندي نينتي بتحكيلي عن ايام زمان كتيييييييييييييير وانا بحب اسمع حكاويها المليانه بالبراءه والطيبه

Eno يقول...

انا زي ماتقولي كده بعملها نص مسبك علي نص ني في ني بتطلع حلوه اصلي انا محدش علمني اخدت الصنعه اجتهادي كده يعني افكر واستطعم واعمل بأه

بالنسبه للارز انا بعمله بالطريقه دي مهو مافيش طريقه تانيه بس احنا بنحبه بشعريه طبعا

بس هجرب كده المسبك واقولك علي الاخبار
تحياتي لحضرتك :)

شمس النهار يقول...

*د/رامي شهاب
من عينيه هنعمل ان شاء الله مكرونه بعد بكره
واحنا يحصل لنا الشرف ان دمج المطبخين قصدي المدونتين مع بعض

شمس النهار يقول...

*احوال الهوي
يعني تمام كده ياريس عرفت اطبخ
حاضر واحنا بنعمل نوع تاني من الرز هنوه علي الموضوع ده حاكم الرز يايعجن يايتحرق
المطبخ نور

شمس النهار يقول...

*الازهري
مابتدخلش المطبخ ليه
يهمني اعرف رأي الجهات المختصه

شمس النهار يقول...

*تيويتر
زي ماتحبي المهم تذاكري كويس وتنجحي واعملي اللي انت عايزاه

شمس النهار يقول...

*اينو
جربيه لأن الباميه من الاكلات اللي انجح حاجه ليها المسبك
المهم قدرت اشرح والا ماعرفتش
فهمتوني بسرع والا كلن في صعوبه
طمنوني

مرايتى يقول...

شكراً على المدونة و الوصفات
تابعونا لتتعلموا معنا طبخات اخرى مميزة .

من كل بلد اكلة

نصائح لمطبخ صحى