الخميس، 15 يناير 2009

مسقعه وشوربة عدس

الحمد لله رجعنا نكمل مشوار الطبيخ مع بعض
وعايزه الفت نظر الزوار ان احنا هدفنا نعلم البنوتات الجداد الطبيخ المصري اللطيف
عشان يعرفوا يطبخوا
النهارده هنعمل مسقعه وكمان شوربة عدس بهديها لعمرو بدر عشان هو كان طلبها مني
المقادير
------كيلو باذنجان رومي-نصف كيلو لحم مفروم ونعصجه(عملناه في المكرونه قبل كده)-بصلتين-خمس فصوص توم
زيت للتحمير-4حبات طماطم-كمون-فلفل اسود -ملح(فلفل رومي للي يحب) معلقتين صلصه
الطريقه
------يقشر الباذنجان ويقطع حلقات سمكها واحد سم ويقلب في معلقه صغيره ملح ويترك مش اقل من ساعتين(ليه ماعرفش)
يقلي البلذنجان في الزيت ويترك حتي يصفي منه الزيت
في صينيه يرص راق باذنجان وراق بصل مقطع شرائح رقيقه والثوم مقطع وراق طماطم مقطعه شرائح رقيقه ثم نضع العصاج المضاف ليه ملعقتين الصلصه ثم نضع فوق العصاج راق بصل وتوم ثم راق طماطم (وحلقات الفلفل الاخضر)
نغلي 2كوب ماء ونضع فيهم الكمون والملح والفلفل
ثم يضاف للصينيه وتزج في الفرن علي نار متوسطه حتي ينضج(بافضل ان الصينيه تكون طاجن)
----------------------------------------
العدس
-----
المقادير
------ كوب عدس-جزره-2حبة طماطم-بصله 7فصوص ثوم-كرفس مقطع صغير جدا-3معالق شعريه ناشفه- ملح فلفل اسود- كمون معلقتين سمن
عيش فينو-معلقتين زبده-3فصوص ثوم
الطريقه
-----يغسل العدس جيدا وكذلك الجزره وتقطع قطع صغيره والطماطم وتقطع ايضا والبصله تقطع قطع صغيره والثوم(3فصوص)
يوضع العدس مع الجزر مع الطماطم مع البصل مع الثوم في حله مناسبه تسمح بالغليان دون ان يفور
ويغمر الخليط جيدا بالماء ويترك حتي يتم النضج ويعرف ذلك من سوا الجزر
يترك الخليط حتي يبرد ويضرب في الخلاط ويصفي بالمصفا السلك
تحمر الشعريه في معلقة سمن صغيره حتي تصفر ويسكب عليها خليط العدس
في طاسه صغيره يحمر(4فصوص) الثوم في معلقة سمن صغيره وعندما يتغير لونه يرفع من علي النار ويضاف للعدس
ويتم غلي الجميع حتي تنضج الشعريه في شوربة العدس
وعند غرفها في الاطباق يرش علي وشها الكرفس الطازج.
---------------------------------------------
طرقة عمل العيش الفينو بالثوم
-------------------------
يقطع العيش الفينو حلقات بالورب
ويفرم الثوم جيد ويخلط مع الزبده السايحه قليلا ويدهن الفينو بالفرشاه بهذا الخليط(الزبده والثوم)(ممكن نرش علي وجهه بعض الزعتر لمن يحب)
يزج الفينو في الفرن حتي يحمص
---------------------------
وبالهنا والشفا

هناك 15 تعليقًا:

عاشقه وغلبانه يقول...

تسلم ايديكي
مع اني مش بحب المسقعه خالص

علي فكره البتنجان بنقلبه في شويه ملح علشان مش يشرب الزيت لما تيجي تقليه
المعروف ان قلي البتنجان بياخد زيت كتير
الخطوه دي بتقلل كميه الزيت


تحياتي ليكي

عاشقه وغلبانه يقول...

علي فكره المسقعه ممكن تتعمل علي البوتجاز عادي وممكن تضيفي ليها مع اللحم المفروم الفلفل الرومي المقلي واحيانا البطاطس


وشوربه العدس ممكن تحطي علي الوش بصل مقلي مع الكرفس
وممكن تسيبيها شووربه من غير الشعريه عن نفسي مش بحب الشعريه خالص

Sweet Violet يقول...

تسلمى ياشموستى

انا بحب اول حاجة و اخر حاجه اما اللى فى النص ابداااااااااااااااا

انا عارفة انى هطرد من المطبخ قريب بسبب كلمة مابحبش دى )):

منتظرة الحلو بقى (:

عمرو يقول...

الله عليكى
تسلم أيدك يا شمس ربنا يخليكى
يالا بسم الله
الأبريق و الطبق النحاس يا شمووووسه

صبرني يارب يقول...

شموسه تسلم اديكى

ايه الحلاوه دي المسقعه انا شامه ريحتها من هنا

بس عارفه ليه بتسبى البتنجان ؟؟

لان الملح بيخلي البتنجان يخرج الهوا الى جواه فلما تقليه ما يشربش زيت كتير

اه ولو عايزه كمان تنزلي زيت القليه حطي البتنجان فى مصفاه بعد ما يبرد وصبي عليه ابريق مايه سخنه بتغلي
وسبيه لما يصفي تاني كويس

وبعد كده بقى استعمليه عادي


بس انا باعمل العدس من غير تقلية التوم دي باحسها تبقى حاميه اوي وانتى عارفه العدس مش ناقص نار يعنى هههههههههههههههه

بس تسلم اديكى يا جميل

شمس النهار يقول...

*عاشقه وغلبانه
طبعا امبسط جدا انك دخلتي المطبخ ونورتيه
وكمان امبسط اكتر لما لاقيتك فاهمه في الطبخ
كنت مره عامله عزومه كده وجبت شيف وكنا هنعمل مسقعه لضيف طالبها مخصوص
لاقيته قطع الباذنجان وعمله بالدقيق وقلاه علي طول
اسكت انا لا
بعد تشاور وتحاور
قال ان دي افضل طريقه للقلي وموضوع الملح ده ماشي بس ده اقوي
عشان كمان الملح بيضيع شويه من الفيده بتاعت البذنجان ودي اللي بتنزل في الماء الاسود الناتج
*اما المسقعه اللي انت ذكرتيها
دي مسقعه علي البارد
وهي يقال اسكندراني
يعني تتقلي البطاطس ولباذنجان والفلفل وتتعمل راقات مع الطماطم وتسقي توم متحمر في الزيت وعليه خل وصلصه او من غير صلصه
وبصراحه برافوا عليكي

شمس النهار يقول...

*ضد التيار
انت نص الاكل مش بتحبيه حضرتك بتاكلي ايه:)
المره الجايه هنعمل ورق عنب عشان من غير عنوان وجلاش عشان بنوتي ضد التيار

شمس النهار يقول...

*عمرو
:)
الله يرحمه نجيب محفوظ بقاهو اللي فتح عيونكم علي الطشت والابريق
بس علي فكره
انا مش ضد الكلام ده بل العكس
بس يكون الرجل يستاهل
تفعيل لنظرية
كوني له امه يكن لك عبد
وفي النهايه بالحب والرحمه والتعاطف والتفاهم كل شئ بيكون لطيف وممكن يتعمل
ماشي
ياسي عمرو

شمس النهار يقول...

*صبرني يارب
تسلمي ياست الكل
موضوع الملح رديت علي عشقه وغلبانه الرد هيعجبك
اما موضوع الماء المغلي ده اول مره اسمع عنه هعمله بس انا فعلا بسيب الباذنجان لما يصفي الزيت شويه
بالنسبه للعدس
بعمله من غير تقليه لما اكون هعمل فتة عدس بس
شكرا علي تعليقك اللطيف

عمرو يقول...

الله ينور عليكى يا برنسيس :)

Unknown يقول...

السلام عليكم ورحمة
الله تعالى وبركاته
المسقعة الحمد لله
اجيد صناعتها ولى
فيها باع طويل
وكذلك العيش الفينو
بالثوم لكن العدس
عايز خبرة وتجربة مرة
واتنين وتلاتة لحد
ما تظبط الامور:) :).
تسلم ايديكى وعنيكى
للحاجات الحلوة دى
ياحاّجة شمس النهار.

شمس النهار يقول...

*نورهاتي
ماهو لازم الواحد يجرب مره واتنين لحد مايظبط الدنيا
عايزه اسألك في حاجه خارج الموضوع يعني ايه نور هاتي
يعني نور حياتي
والا نور ربنا
والا ايه

كلام على بلاطة يقول...

ليه يا سادة تعاهدنا على السمع والطاعه؟؟؟
للحفاظ على الجهل والتخلف والغلاسة والنطاعة
والكذب بكل اخلاص وصدق وحرفنة وبراعــــــة
والعمل بقوة وجدية فى الهيافة والاضاعـــــــة
ومحاربة الابداع ونشر الصراع بما يضعـف المناعة
وقتل الوقت وزرع المقت والكره والنفوس الملتاعة
والتقهقر للوراء وان مشينا نكون فى منتهى اللكاعة
ونشر الفحش وارتكاب الجرائم بكل الخســـة والشناعة

(حلـم) يقول...

يسلم ايدك وعنيكي واللة يهنيكي علي ها الهنا ولو اني مش مغرم مطبخ سلام يا شموسة..حلم..

ŞΘ๏ŞΘ๏ يقول...

من زمان خاطري اعرف الطريقه المصريه لها

تسلم ادينك