الأربعاء، 21 يناير 2009

الكوارع

النهارده هنعمل كوارع
وجلاش عشان ضد التيار(حاجه حلوه اهي)ولو ان انا ماليش في الحلو قوي بس ادينا هنجرب مع بعض وربنا يسترها معانا
المقادير
*****كوارع متنظفه جاهزه ومتكسره قطع متوسطة-ملح-دقيق-خل- حبهان مطحون-مستكه-ورق لوري مطحون-جنزبيل-فلفل اسود-3بصلات مبشورين مع اربع فصوص توم
الطريقه
*****تغسل الكوارع جيدا بالملح والدقيق والخل اكثر من مره
وتشطف بالماء جيداوتنقع خمس دقائق في ماء وخل ثم تشطف مره اخيره
يضاف فلفل اسود وملح ولوري الي تلتين البصل المبشور بالتوم وتنقع الكوارع فيه من قبلها بيوم
وتاني يوم في حله مناسبه نضع ماء يغلي ونضع فيه باقي البصل بالتوم مع الحبهان والمستكه واللوري والفلفل الاسود ونأجل الملح عند الدخول في السوا
عند غليان الماء نضع الكوارع ونتركها حتي تنضج جيدا
وكل ما الماء ينقص نضيف ماء بس يكون مغلي ومش بارد
عند تمام النضج سنجد ان العظم بدء ينفصل عن لحمة الكوارع
نستخلص هذا اللحم من العظم جيدا ونقطعه قطع صغيره مناسبه
ونصفي الشوربه الناتجه
لأن احيانا بيكون فيها قطع عظم صغيره جدا
بعد تصفيتها نضع قطع الكوارع المقطعه ونغليهم مع بعض 5دقائق
وتقدم مع الليمون والفته(سبق عمل الفته)ومافيش مانع لحمه كده يعني
-------------------------------------------
الجلاش
******المقادير
***********ورقة جلاش-1كوب سكر-مكسرات للحشو او كاستر-4معالق سمن-فانيليا-نصف كوب لبن مضاف له نصف كوب ماء-عصير نصف ليمونه
الطريقه
******الشربات
****** نضع كوب ونصف ماء مع كوب السكر علي النار حتي يغلي تماما ونضيف له عصير نصف ليمونه ونتركه يغلي ونضيف له الفانيليا
الصينيه
******تفتح ورقة الجلاش و
في صينيه مناسبه مدهونه بالسمن
نضع راق جلاش ويدهن بفرشاة السمن ثم نضع الراق التاني حتي تنتصف الكميه
نضع الحشو(مكسرات او كاستر)ثم نكمل باقي الطبقات
تقطع الصينيه بالسكين مربعات
ثم تسقي بالماء واللبن
وتزج في الفرن حتي تدخل علي اللون الذهبي
وتخرج من الفرن وتسقي بالشربات البارد السابق اعداده
هذه الصينيه علي مسؤلية ضد التيار
وعلي المتضرر اللجوء لها عشان تحرم تقولي عايزه حاجه حلوه
ربنا يستر
وبالهنا والشفا

هناك 35 تعليقًا:

Sweet Violet يقول...

هذه الصينيه علي مسؤلية ضد التيار
وعلي المتضرر اللجوء لها عشان تحرم تقولي عايزه حاجه حلوه
ربنا يستر

********

هههههههههههههههههههههههههههههه

لالالالالا احنا فينا من كده انى اعترض

ولا اقولك بقى خلاص خلاص ماشى على مسؤليتى مش مشكله اصل انا عارفة انها هتكون حلوة (:

بس انا مش بحب الكوارع

عاااااااااااااااااااااااااااااااااااااااااااااااااااااااااااااااااااا

بس انا هاخد الحلو بس و لاكانى شوفت حاجة تانيه ((:

تسلميلى شموستى على الحلو (:

و ان شاء الله نجرب نعلمه و ربنا يستر بقى على المطبخ عندنا ):

*^*AL.7aAzZeEnN*^* يقول...

هههههههههههههههههه

هههههههههههههههههه

ههههههههههههههههه

مبحبهاش للأسف الكوارع هههههه

اسمها غريب اهئاهئاهئ

تحياتي

اتمني زيراتك الي مدونتي المتواضعه ط

دمتي بكل ود و سرور

صبرني يارب يقول...

كوراع يا شموووسه كوااااارع

هههههههههههههههه

بصي انا مش باحبها بس انا عاده باحب اتعلم اطبخ اي حاجه

وحيث ان ولادي بياكلوها مع بابا وجوزي كمااااان اتعدى منهم فانا عارفه ان هايجي عليا يوووووم وامسك رجل الجموسه الاموره دي واطبخها

بس بصي بقى تقطيع بعد ما تستوي وامسك اللزاجه دي بايدى نو نو نو

هما يمسكوها كده وياكلوا يا اختي

وبالنسبه للجلاش تمام ماهو زي الفل اهو
بس انا اول مره اعرف ان الجلاش الحلو بيتسقى لبن ما جربتهاش بس نجرب يعنى ما نقول لا

انا بابقى اعمله شربات خفيف شويه عشان يبقى طري

والجلاش الى محشي كاستر او كريم باتسيير بتهيئلي مش هايحتاج اللبن ده هو بيبقى طري خلقه ههههههههه

تسلم اديكى يا جميل

صبرني يارب يقول...

اه شموسه تعالى زوريني بقى المطبخ عشان تقوليلى راييييييك

مدونة طابخين ايه النهارده

http://tabkheen-eah.blogspot.com/

Kiara يقول...

عاااااااااااااااااااا

كوارع عاااااااااااااااااااا مش بحبها


كدا ازحل بقي بس هييييييييييه فيه جولالالااااااااش

************

وعلي المتضرر اللجوء لها عشان تحرم تقولي عايزه حاجه حلوه
ربنا يستر

عاااااااااااااااااااااااا

اه يابطنى

انتي السبب ياضد

طب ضد ياضد ضد ياضدضد ياضدضد ياضدضد ياضدضد ياضدضد ياضدضد ياضد هه بس

اءاءاءءاءاءاءاء في حد شكله متعصب هونااااااااااا

بس انا في بيت مامتي حبيبتي بقي كيكيكيكيكيك

عاشقه وغلبانه يقول...

مش بحب الكوارع للاسف
بس بموت في المنبار

ممكن المره الجايه
ههههههههههههههههههههههه

عمرو يقول...

الله ينور يا برنسيس
هو ده الأكل اللى يرم العضم بصحيح و لو أنه جاى متأخر شويتين عن ميعاده بس مين عارف ؟؟ :))
نتشكر ليكى و تسلم أيديكى على الطبيخ و على التفصيص بس كده مش حتبقى كوارع دى حتبقى عيش سرابا !!

شمس النهار يقول...

*ضد التيار
انت ضد الاكل مش ضد التيار
مالها الكوارع مادام مش هتتمسك بالايد
خلاص بس هي مفيده جدا
وبطلي مابحبش دي
لازم تحبي

شمس النهار يقول...

*القلب المنكسر
طب تقترح نسميها ايه
حاضر هزور مدونتك

شمس النهار يقول...

*صبرني يارب
ماانا كمان مش بمسكها باليد
لا
بقطعها بالشوكه والسكين الرفيعه جدا بتاعة الفراخ
واحطها في الحله عشان ماحدش يمسكها باليد كله بالملعقه

شمس النهار يقول...

*كيار
بطلي عياط وقولي عايزه تاكلي ايه

شمس النهار يقول...

*عاشقه وغلبانه
حاضر نعمل الممبار علشان خاطر عيونك

شمس النهار يقول...

*عمرو
تسلم الله يخليك
ماانا بفصصها عشان ماحدش يمسك الكوارع باليد
كله بالملعقه
بس سؤال هو الاكل له موعد

أسطى في زمن البلي يقول...
أزال المؤلف هذا التعليق.
أنا - الريس يقول...

مبارك علي المدونة الجديدة .. وعبال ما تعلمنا الإتيكيت .. لأنه مهم جدا .. ودمتي بخير وسعادة وهنا وفرح و سرور ووووووو .. في امان الله ورحابه

mostafa rayan يقول...

احيك على هذا الاطباق الجامد جدا

بسمة انور يقول...

ايه المطبخ الهايل دة
انا بحب المطبخ جدا
حتى لسة عالمة صينية كيك بالشكولاته والحمد لله ماما حرقتها

هههههههههههه

بس كلناها برده
بس بالنسبة للكوارع...عمرى ما اكلتها خالص

♥نبع الغرام♥♪≈ يقول...

السلام عليكم ورحمة الله وبركاته
بصراحه ده اول مرور لى بس بجد فكره جميله قوووى انك تعملى مدونه عن المطبخ
انا عن نفسى بحب المطبخ قووووووووووووى
تقبلى مرورى
مع تحياتى

شاب كــ طخين ـــــا يقول...

السلام عليكم

كوووووووارع
ليه كدة حتى احنا فى ايام مفترجة عيد أم وحاجات كويسه :D

المفروض المدونة هنا كلها كلام بس مفيش اى حاجة تصبيرة :D

تسلم ايدك وطبعا ولاادك محظوظين علشان بتعمليهم الحاجات دى

بس بردو لازم تشوفى حل مش هندخل المدونة نقرآ بس عايزين اى حاجة حتى ممكن خس على اساس اننا أرانب :d

سلام

غير معرف يقول...

تصدقي جوعتيني :( :(

هاتي حته بقي

القمر الساهر يقول...

ايه دة طباخة شطووورة بجد

ما شاء الله

فكرتيني بمنتدى نسائي للطبخات اعمله دعاية وتعالى علميهم هههههههههه

تسلم ايدك

mimi يقول...

الطريقة دي مصرية؟؟؟
أنتي متاكدة؟؟؟
طب ليه ماما مش بتعملهالنا كدة؟
دي بتقدمها بعضمها والحياة بتبقي منتهي اللزقة
تحياتي ... بالهنا والشفا

لؤلؤة يقول...

تسلم ايدك كان نفسي فيها من زمان

الفقيرة إلى الله أم البنات يقول...

هو أنا وعيلتى ملناش فى الكوارع
بس تسلم إيدك
هى عيبها انها بتلزق بس اظنها بتدى طاقه ومفيده للاطفال بس هما مش بيحبوها

انا عندى مشكله
والله العظيم بعرف أطبخ واعتبر ست بيت معقوله مفيش شكوى بتوصل للجيران

فاشله فشل ذريع فى عمل الكشرى
تفتكرى ده سببه إيه؟؟
مع ان بناتى بيموتوا فيه وانا مش عاوزة اشترى حاجه من بره اليومين دول
فاذا كنت بتعرفى تعمليه وشاطره فيه
مش زيي
أمانه عليك الوصفه ربنا مايكسف لك طبخه

Maha Shahen يقول...

يعنى يا شموسه يوم ما اجى اقول استعير منك طبخه الحق اعملها تقوليلى كوارع انا عايزه حاجه تيك اواى يا قلبي مش هلحق اعمل كل دا
شوفيلى حاجات خفيفه يا شموسه لأختك المحتاسه بترجع من الشغل نفسها تاكل وبترسى علي اى كلام
يعنى اخد اجازه وانعزم عندك بقى ولا اكل فين انا مليش دعوه بقى واااااااء

(حلـم) يقول...

اية حاجة من ايدك ياشمس خير وبر كة اي شيء لانك ست طيبة جدا بدليل انك محترف مطبخ بس بين ضلاعك قلب اديب لوجينا المحروسة تعزميني ع مطبخك الحترم المؤدب..حلم..

mostafa rayan يقول...

هذا وقد قال احد الحكماء قديما الكوراع دي اكله جامده جدا يا جدعان
بتنشط الدم وتقوي الركب وتقوي الانسان
وبعدين ايه ممسكهاش بايدي دي ؟ايه الدلع ده هو في احلى من ان الواحد يمسكهاوياكلها بأيده وبعدين نفضل نخبط فيها علشان تنزل البهاريز على المعلقه ويا سلام بقي لوجنبها صينيه فته بالخل والتوم والصلصه تاكلى وتبقي قايمه عايزة تهدي الحيطه من كتر الطاقه اللي ملت جسمك خصوصا لو جنبها صينيه جلاش بالحمه المفرومه مش ابو لبن ده
يبقى بجد شيئ ولا اروع
اه فتحتى نفسنا يا شموسه على الحاجات الحلوة دي

safa7_karmooz يقول...

على فكرة الكوارع حلاوتها بالعضم ومحاولتنا المميتة لانقاذ اللحمة من على العضم ^_^

مهرة سالم يقول...

السلام عليكم..
ماشاء الله دايما عامر ...
بس ينفع إني أعزم نفسي وأجي آكل عندكم
لأنه من المستحييل أعرف أعمل كوارع زي إلي بتعمليها يا شموسه ...
ولو إني عمري مكلتش كوارع ..
....
في أمان الله

لــــ زهــــــراء ــــولا يقول...

برافوووووووووووو تسلم الايادي ياقمر
بس فيه ملحوطة لازم نحط الماية ولما تغلي نحط الكوارع والبصل مع بعض لان البصل هيصفر الماية على ما يخلي ويخلي لونها اخضر

أبو مصعب يقول...

السلام عليكم ورحمة الله وبركاته
على فكرة بقى انا عايش فى شقة فى القاهرة عشان الدراسة وكده يعنى
مع جماعة صحابى وانا الوحيد تقريبا اللى ما بيعرفش يطبخ فياريت تعلمينى اطبخ رز ومكرونة والحاجات دى يعنى
ظروف بقى وربنا يعدى الكلية دى على خير لان معدتنا باظت من الدليفارى

mrmr يقول...

الله عليكى يا قمر
كوارع وجلاش وااااااااااااو
مدونتك جميله
بس انت ليه كسوله كده يا قمر
انا لازم احطها عندى على الريدر علشان اتابعك ضرورى
مدونتك ح تنور مدونتى ركن المراه
رمضان كريم

والف سلامه عليكى يا جميل

tote soly يقول...

الله يا شموسه نا بحب الكوارع جداً
تسلم الأيادي من يد ما نعدمها
وكل سنة وانتي طيبة
وعيد سعيد عليكي

الجوكر يقول...

يااااااااه ياشموسه

فكرتينى بالكوارع

تعرفى اننى من زمان مكلتهاش

تقريبا من قبل متولد

لكن ان شاء الله بكلها على ايديكى

لأن وصفتك هايله

..

مع كل التقدير لشخصك ومطبخك الرائع

rnoo يقول...

مجلة أناقة


أناقة
البشرة
الشعر
المرأة والحمل
الشعر
المرأة المسلمة
حلويات
وصفات مجربة
مكياج
فساتين
احذية
ازياء
شنط نسائية