الاثنين، 17 نوفمبر 2008

طاجن الرز

السلاااااااااااااااااااااام عليكم بناء علي طلب صابر وراضي
اللي مش راضي باللي بعمله ومش صابر عليه اعمله كل اللي هو عايزه هنعمل علي بركة الله برام رز
المقادير
*********كبد وقوانص حسب الطلب الوزن-بصلتين مبشورين-فص توم- نصف كوب لبن- كوب شوربه- نصف كوب ماء- 2كوب رز- ملح فلفل-حبهان-مستكه-لوري مطحون-لحمه شرائح انتركوت-خل-3ملعقة سمنه
الطريقه
********تغسل الكبد والقوانص جيدا بالملح والدقيق والخل وتقطع قطع صغيره بالنسبه للقوانص اما الكبده الحجم اكبر عشان فرق السوا-وتنقع ساعه في البصل المبشور والتومه المفرومه والملح والفلفل والحبهان المطحون واللوري المطحونه
يغسل الرز ويضاف الي الخليط السابق ويقلب مع وضع معلقة سمنه ويوضع الكل في حله ويضاف الماء ونصف الشوربه والمستكه
ويرفع علي النارحتي يشرب الشوربه بالماء
ينقل في الطاجن او البرام ويضاف اللبن المغلي مع باقي الشوربه ويزج في الفرن
ويترك الي ان ينضج
اللحمه
*****توضع معلقتين السمنه في صينيه واول ماتقدح نضع شرائح اللحم ونقلب حتي يحمر اللون
نخلط كوب ماء مع ربع كوب خل مع ملح مع فلفل اسود ونضيفهم للحمه وتغطي وكل ماتشرب الماء نضيف نصف كوب ماء الي ان يتم النضج(اللحمه دي مهداه الي ابني مفكر وابني رامي شهاب)
بالهناء والشفاء

هناك 24 تعليقًا:

عمرو يقول...

لأ لأ لأ لحد كده و حرام عليكى يا شمس !!
أنا زهقت من أكل المطاعم هههههه بس شكلها حتفرج قريب
طاجن رز و بشامل و باميه و ملوخيه و شورة الكريمه حلو كده
طيب خدى بالك من الكانيلونى و حياتك ما تنسيهوش

Sweet Violet يقول...

تسلم ايدك ياشموسه (:

احنا دايما بنعمل الكبد والقوانص بالفريك ... بس نجرب بالارز (:

بس فين الحلو بقى ؟؟؟

mahasen saber يقول...

بسم الله ما شاء الله
ايه الخيرات دى كلها ...حلو قوى قوى

بس انا بئه لقيت فى طلبات وبتنفذ للحبايب اهه
طب هايل يا شموسه انا بئه عايزه اكله مكونه من اى نوع من انواع اللحوم عشان خاطر بيرو افندى لانه مبيحبش اللحمه وبضطر اخبيهاى اى شئ عشان ياكلها
يعنىلا شاورمه ولا كفته ولا سمبوكسه ولا اى شئ فيه لحمه بياكله ممكن حضرتك تحليلى الموضوع ده عشان معصبنى
غلبت ااقله يا ابنى هو حد طايلها ابدا
يا ابنى مفيده ابدا
يا ابنى سيمبا مبيكلش غيرها بتاتا

افيدينى افادك الله

وتسلم تسلم تسلم ايد حضرتك

مفكر يقول...

السلام عليكم::

أنا استمتعت بالقراءة حقيقة

بس برضه الموضوع كبير ومحتاج اكون لوحدي واخترع مع نفسي

وشكراً جداً على اهدائك الجميل..

على فكرة اتضح اني عندي مهارات مدفونة

طريقة اللحمة دية انا بعمل شبها في العيد الكبير

بجيب قطعة لحمة وأتبلها في البصل والملح والحبان المطحون والفلفل الأسمر وبعدين أشوحها في زيت..

د/ رامي شهاب الدين يقول...

شكرا.. شكرا ياماما شمس

أنا بقى بهدى لك أغنية تامر حسنى ومايحرمنيش منك هههههههه

بصراحة أنا حتى الآن سعيد جدابتجربة المكرونة، أتمنى أكررها قريبا

إنتى قولتى : تغسل الكبد والقوانص جيدا بالملح والدقيق والخل

عندى سؤال يمكن سؤال ساذج وعبيط بس برده هقوله .. ليه بنغسل بالدقيق؟، طب الملح والخل عرفناها ، لكن الدقيق شغلته إيه فى الحوار ده؟

وشكرااااااااا

mido يقول...

مبروك المطبخ نجح نجاح ساحق فى وقت قصير

أحــوال الهـوي يقول...

تذوقت نفس الطاجن بس بالحمام و بعدها عقلي طار

بالنسبه للرز ينقع ايضا انا اعتقد لا علشان ما يعجنش

تسلم اديك
تحياتي

خمسة فضفضة يقول...

السلام عليكم ورحمة الله وبركاته

ما شاء الله الاكلات كلها روعه ، تسلم اديك يا شموسه

شمس النهار يقول...

*عمرو
حاضر من عينيه
بس لما نخلص الاكل المصري الاول
هنعمل شوية اكلات من بره اللي بعرف اعملها طبعا

شمس النهار يقول...

*ضد التيار
جربي وقولي لي انا كمان بعملهم بالفريك
بس بالرز بيكونوا احلا زي اللي جوه الحمام المحشي كده

شمس النهار يقول...

*محاسن صابر
موضوع ابنك مالوش حل
ممنك تديله البروتين الحيواني من حاجات تانيه فراخ بيض لبن جبنه قشطه
وماتضغطيش عليه عشان هيعند هو شايف انها مش حلوه
ابن واحده صحبتي كان كده وهو صغير
ولما كب شويه شويه هيدبحنا وياكل لحمنا لما اضحك معاه يقولي بعوض مش كفايه وفرتلكم 18 اكل زي ماانا عايز وبكره ان شاء الله لما يخرج مع اصحابه ويلاقيهم بياكلوا هياكل لوحده معاهم
ربنا يبارك لك فيه

شمس النهار يقول...

*مفكر
لا الطريقه دي مابننقعش اللحمه بتتعمل علي طول ودي طريقه سريه ونتيجتها لطيفه والخل بيدي طعم جميل
جربها كده

شمس النهار يقول...

*د/رامي شهاب الدين
تصدق وربنا مااعرف انا لطلعت لاقيتهم بيعملوا كده تفتكر ليه
طب نسأل مين
علي فكره انا بحب اغاني تامر حسني جدا
بغض النظر علي شكله الاهبل وتصرفاته الاهبل منه بس هو ولد حساس جدا وموهوب كان عايز حد يتبناه صح ويوجهه بس الوسط الفني دلوقتي بقه فيه غيره وتضارب مصالح
في اغنيه كان ملحنه له حسن ابو السعود الله يرحمه
بحبها جداالبنات جابوهالي من علي النت لسه قريب

شمس النهار يقول...

**ميدوووووووووووو
اين انت ياصديقي ده انا كنت هخلص واروح مدونتك اعملك لفت نظر
كنت فين والظمبليته في المطبخ

شمس النهار يقول...

*احوال الهوي
مابحبش انقع الرز عشان ممكن يكون نوعه مش حلو يبوظ

شمس النهار يقول...

8خمسه فضفضه
ده من زوقك
ياتري جربتي حاجه منهم

tarek momen يقول...

دي حاجة حلوة خالص
تحياتي

شمس النهار يقول...

*طارق
شكرا ياريس
اتفضل مد ايدك

من غير عنـــوان يقول...

ربنا يديكي العمر الطويل

كانت جدتي الله يرحمها بتعمله بالكلاوي

وكنت بأحبه جدا

أنا بأحب الكبده لكن مش بأحب القوانص

بس تسلم ايديك

الجواز و سنينه يقول...

و الله انا ماكونتش جعانه و دخلت عندك جوعت
الرجيم معاكى هايروح فى خبر كان
تحياتى

صابر وراضى يقول...

وعليكم السلااااااااام:

الله ينور عليكى
بس عندى ملحوظه واحده
اعمل ايه بس لسانى بيجبلى كتير
اقول واجرى على الله
انا ياستى مش باكل الكبده او القوانص
عارف انك هتقولى اللى عاجبه ياكل واللى مش عاجبه الباب يفوت جمل
ههههههههههههههههههههه
خلاص انا هاكل لحمه مع الجماعه
ولا اقولك انا هاكل كبده واللى يحصل يحصل

شمس النهار يقول...

*من غير عنوان
ممكن تتعمل بالكبده بس
او حتي من غير الاتنين بقطع لحم صغيره جدا بس تكون اتبلت قبل كده واتسلقت وفي الحاله دي نسقي الرز بالشوربه الناتجه

شمس النهار يقول...

*الجواز وسنينه
ماتخافيش كلي كل حاجه بس مش كميات كبيره واعملي رياضه واتحركي كتير

شمس النهار يقول...

*صابر وراضي
السلاااااااااااااام عليكم
طب اعمل ايه
ماشي اعمل الرز من غيرهم باللحمه
ماشي